М.Х.Дулати атындағы Тараз университетінде «Қазақ тілі мен әдебиеті» кафедрасының ұйымдастыруымен кәсіби бағдар беру жұмысы бойынша 11 сынып оқушыларына болашақ таңдау мамандықтарына бағытталған ақпараттарды беру, ҰБТ ережелерімен таныстыру мақсатында 6В01700 «Қазақ тілі мен әдебиеті мұғалімдерін даярлау» білім беру бағдарламасы: мүмкіндіктері мен перспективалары тақырыбында мектеп бітіруші түлектеріне арналған кездесу өтті.

Жиынға Тараз қаласы «Озат білім компаниясы» Ozat high school, 125 high school мектептерінің қазақ тілі мен әдебиеті бейінді пәндер комбинациясын таңдаушы 11 сынып оқушылары қатысты.

Кездесу барысында «Қазақ тілі мен әдебиеті» кафедрасының меңгерушісі п.ғ.д., профессор Т.Р.Абдыкадырова бакалавр, магистратура, докторантура білім беру бағдарламары бойынша ақпараттар берді.

Кездесуде қабылдау комиссиясының жауапты хатшысының орынбасары Айнұр Санаққызы және маркетинг және кәсіптік бағдарлау басқарма басшысының орынбасары Диана Еркешевна сөз алып, оқу ордамыздың бүгінгі жетістіктері мен қос диплом алу мүмкіндіктері және білім беру бағдарламаларының ерекшеліктері, академиялық ұтқырлық туралы баяндама жасады.

«Қазақ тілі мен әдебиеті» кафедра оқытушылары: PhD доктор Е. Абдимомынов, ф.ғ.к., доцент Ж. Абдуалиева, Г. Мейрманова «Қазақ тілі және әдебиет педагогтерін даярлау» болашақ түлектерді мүмкіндіктер мекені - Дулати университетінің қабырғасына оқуға түсуге шақырып, оқушылармен еркін форматта пікір алмасты.