ҚР Мемлекет және қоғам қайраткері, техника ғылымдарының докторы, профессор, халықаралық және ұлттық инженерлік академияларының академигі Марс Үркімбаевтың туғанына 85 жыл толуына арналған ғылыми – тәжірибелік конференция өтті.
Іс-шара мақсаты – ғалымдардың білім беру жүйесіндегі тәжірибелерімен бөлісіп, үлкен бедел мен сый-құрметке ие болған Марс Үркімбаевтың білімі мен ғылымын жастарға өнеге ету. Конференция шымылдығы Марс Үркімбаевтың ескерткішіне гүл шоқтарын қою рәсімімен ашылды. Гүл қою рәсімінен кейін көрнекті тұлғаға құрмет көрсету мақсатында көрме ұйымдастырылды.
М.Х Дулати атындағы Тараз университетінің ардагерлер кеңесінің төрағасы Сағатбек Мырзашев сөз алып, «Бұл конференция – білім мен ғылым жолында өлшеусіз еңбек етіп, жастардың келешегі үшін батыл қадамдарға барған азаматқа деген елдің құрметі»,- деп өз лебізін жеткізіп, жиынды ашып берді.
Өз кезегінде қала әкімінің орынбасары Қайрат Исмаил: бүгінгі игі іс-шараның өңіріміз үшін тарихи сәт болып қалатынын атап өтіп, жоғары білім беру ісін дамытып, ғылымның өрістеуіне жол ашқан, түрлі салада басшылық қызметтер атқарып, ел экономикасын дамытуға үлес қосқан тұлғаның соңында өшпес ізі қалғанын сөз етті.
Қазақ ұлттық су шаруашылығы және ирригация университетінің ректоры Камшат Тусупова Марс Фазылұлының жоғары кәсіби біліктілігі туралы, ғылымдағы еңбегі айшықталып, шәкірттері үшін үлгі екенін жеткізіп, еліміздің ғылымы мен білім сапасын арттыруға қосқан орасан зор үлесін атап өтті.
Басқарма мүшесі – стратегиялық даму және интернационалдандыру жөніндегі проректор Шолпан Есімова халықаралық және ұлттық инженерлік академиясының академигі туралы баяндама оқып, қажырлы еңбегі мен қоғамның зияткерлік тұрғыда дамуына қосқан зор үлесі жоғары бағаланатынын айтты.
Салтанатты басқосуда Әбдіраманов Ә.Ә «Аңызға айналған әріптес», Ибатуллин С.Р. «Марс Үркімбаев – КСРО-да тұңғыш рет нарықтық жағдайда мақсатты кадрлар дайындаудың негізін қалаушы», Жүнісбеков С.С. «М.Үркімбаев – механика саласындағы пәндердің жанашыры», Әлімбаев Б. «Марс Үркімбаев – гидроқалашықтың негізін қалаушы», Мұсабеков А.С. «Гидро – чемпиондар ұстаханасы» атты пленарлық баяндамалар оқыды және ғылым жолындағы ілкімді ізденістері мен қол жеткізген табыстарының қомақтылығы туралы айтылды.
