Университет қабырғасында «Цифрлық дәуірдегі кәсіптердің трансформациясы» тақырыбында XXVII студенттік ғылыми-тәжірибелік конференцияның ашылу салтанаты өтті.
Салтанатты жиында Басқарма мүшесі – ғылым және цифрландыру жөніндегі проректор Сейтжан Орынбаев сөз алып, қатысушыларға сәттілік тіледі. Конференция тақырыбының өзектілігіне тоқталып, аталған бастама тек түрлі кәсіптердің маңыздылығын көрсетіп қана қоймай, цифрлық технологиялар жағдайында адами капиталды дамыту, білім беру және еңбек нарығы үшін жаңа мүмкіндіктер ашатынын тілге тиек етті. Сонымен қатар, ғылыммен айналысудың қажеттілігі мен артықшылықтары туралы сөз қозғап, 2024 жылы білімгерлердің жеткен түрлі жетістіктеріне тоқталды.
2024 жылы халықаралық, республикалық, облыстық, қалалық және ішкі университеттік байқауларға жалпы 209 студент қатысты. Нәтижесінде, 32 студент халықаралық, 20 студент республикалық, 41 студент облыстық, қалалық және ішкі университеттік байқаулардың жеңімпазы атанды. Сондай-ақ, 2024 жылы Дулати университетінің жас ғалымдарының 17 стартап-жобасы жеңімпаз атанып, жалпы 2 990 000 теңге инвестиция тартты. Студенттер мен оқытушылардың университет жинақтарында және басқа басылымдарда жарияланған ғылыми еңбектерінің жалпы саны 398-ді құрайды. Атап айтқанда, университет жинақтарында 149 ғылыми мақала мен баяндама, басқа басылымдарда 249 мақала жарық көрді.
Пленарлық отырыста 8 студент өзекті және қызықты тақырыптар бойынша баяндама жасады. Олардың ішінде жасанды интеллектті тиімді пайдалану, пилотсыз ұшу аппараттарын басқару жүйесін әзірлеу, Ansible AWX көмегімен жұмысты автоматтандыру, Қазақстан Республикасында гастрономиялық туризмді дамыту мүмкіндіктері, Қазақстандағы венчурлік инвестициялар, еліміздің тәуелсіздігінің басталуы және «Қазақ» газеті – Қазақстан тарихының дереккөзі ретінде қарастырылды.
Пленарлық баяндамалар қорытындысы бойынша, Технологиялық факультеттің 4-курс студенті Ералы Акиловқа Сейтжан Орынбаев ЖОО- ны тәмамдаған соң «Жобалық басқару және цифрландыру» орталығында жұмыс жасауға ұсыныс жасады. Нәтижесінде, Ералы өз ғылыми жұмысын іс жүзінде жүзеге асыру мүмкіндігін қарастыратынын жеткізді.
Конференцияның ашылу салтанатында 2024 жылдың қорытындысы бойынша Республикалық студенттік ғылыми-зерттеу жұмыстары байқауының жеңімпаздарына ҚР Ғылым және жоғары білім министрлігінің Дипломдары табысталды.
XXVII студенттік ғылыми-тәжірибелік конференция аясында 17 секцияның отырыстарында жаратылыстану, техникалық, әлеуметтік-гуманитарлық, педагогикалық және экономикалық ғылымдар бойынша 387 баяндама тыңдалады. Конференция 10 сәуірге дейін жалғасады.
