М.Ф. Үркімбаев атындағы Жастар сарайында Ұлы Жеңістің 75 жылдығына арналған XXI студенттік ғылыми-тәжірибелік конференция өтті.
Жаратылыстану, техникалық, гуманитарлық-әлеуметтік және экономикалық ғылымдар бойынша өтетін бұл конференция жұмысында барлығы 890 баяндама тыңдалады. Наурыздың 13 күні үздік жұмыстар марапатталатын болады.
Конференцияны ашқан университет ректоры М.Н. Сарыбеков жылда ұйымдастырылатын конференцияның негізгі мақсаты студенттік ғылымды дамыту, жастардың ғылымға қызығушылығын арттыру және оларды қолдау екенін жеткізді.
– 2019 жылы университетіміздің жастары ғылым саласында жақсы көрсеткіштерге ие болды. Халықаралық, республикалық, облыстық конкурстарға барлығы 436 студентіміз қатысып, нәтижесінде 18 халықаралық, 74 республикалық және 42 облыстық, қалалық, жоғары оқу орындары ішіндегі түрлі конкурстардың жеңімпазы мен жүлдегері атанды.
Былтыр Беларусь мемлекетімен бірлесіп Экология тақырыбында Халықаралық олимпиада ұйымдастырдық. Оқу ордамыздың жастары аталмыш білім додасының жеңімпазы атанды.
Университетіміздің Enactus Dulaty командасының жетістігін баршамыз білеміз. 2019 жылдың қыркүйек айында АҚШ-тың Сан-Хосе қаласында өткен Әлем чемпионатына қатысты. Ал Букешова Салтанат, Кеңесова Ақгүл, Егембердиев Дәулет, Айнақұлова Айтолқын, Сатов Бейбіт, Әбуталипов Ернұр, Темірханов Бауыржан, Иманалиев Талғат сынды жастарымыздың жеңісі біздің жетістігіміз әрі мақтанышымыз, - деді университет басшысы.
Конференция барысында жаратылыстану-техникалық, әлеуметтік-гуманитарлық және экономикалық ғылымдар бойынша студенттердің ең үздік ғылыми жұмысына арналған республикалық байқаудың жеңімпаздары марапатталды.
XXI студенттік ғылыми-тәжірибелік конференция пленарлық баяндамалармен жалғасты. Тарих мамандығының 4-курс студенті Біржан Дүйсебай, Биотехнология мамандығының студенті Аяулым Жанысбек, Экономика мамандығының 1-курс студенті Анна Ажибекова және Заң мамандығының 4-курс студенті Айгерім Иманалиева өз мамандықтарының өзекті тұстарын қозғай отырып, маңызды мәселелер көтерді.
Медиа-қызмет