М.Х.Дулати атындағы Тараз университетінің ұйымдастыруымен бүгін 2-қазан күні «Көне Тараз» тарихи-этномәдени кешенде «БАЙСАЛОВ ОҚУЛАРЫ – 2026» Халықаралық ғылыми-практикалық конференциясы өз жұмысын бастады.

Аталған конференция Қазақстан Республикасы Ғылым және жоғары білім министрлігі Ғылым комитетінің бағдарламалық-нысаналы қаржыландыруы аясында қаржыландырылатын ИРН BR24993047 «Жер қатынастарын реттеудің заманауи сын-қатерлері: тарихи-құқықтық талдау» ғылыми бағдарламасын іске асыру шеңберінде ұйымдастырылды.

Тараз қаласында тұңғыш рет ұйымдастырылып отырған «БАЙСАЛОВ ОҚУЛАРЫ»  Халықаралық ғылыми-практикалық конференциясы биыл «Жаңа Конституция және Қазақстанның тұрақты дамуы: жер қатынастарын реттеудің құқықтық, әлеуметтік-экономикалық және экологиялық басымдықтары» тақырыбында өтуде.

Халықаралық конференция Қазақстан Республикасының еңбек сіңірген заңгері, заң ғылымдарының докторы, профессор Сағындық Байсалұлын еске алу және оның отандық заң ғылымына қосқан үлесін ұлықтау мақсатында ұйымдастырылып отыр. Шараға ҚР Ғылым және жоғары білім министрлігінің өкілдері, отандық және шетелдік жетекші ғалымдар, заңгерлер, экологтар қатысты.

М.Х.Дулати атындағы Тараз университетінің ректоры Ләззат Еркінбаева алғы сөзбен конференцияны ашып, ғалымның өмір жолы мен еңбегіне тоқталды. Сағындық Байсаловтың шәкірті ретінде ұстаздан терең біліммен қатар, адалдық, еңбекқорлық пен жауапкершілік сынды құнды қасиеттерді де бойына сіңіргенін айтты.

Алқалы жиында Жаңа Конституция аясындағы жер қатынастарын құқықтық реттеу, еліміздің тұрақты дамуын қамтамасыз етудің әлеуметтік-экономикалық тетіктері мен экологиялық қауіпсіздік мәселелері кеңінен талқыланды. Халықаралық конференцияда ғалымдармен қатар, ҚР Құрылтайының депутаттары, заң саласының мамандары баяндама жасады.

Түрлі сала мамандары бас қосқан жиында заң, құқық бағытында жарық көрген ғылыми еңбектердің тұсаукесер салтанаты өтті.

Ғылыми-практикалық конференция Дулати университеті қабырғасында профессорлар мен студенттердің «Ашық диалог» форматында кездесумен жалғасты.

Сұхбат алаңында заң ғылымдарының докторы, профессор, ҚР ҰҒА академигі Бақытжан Жарылқасынұлы, заң ғылымдарының докторы, профессор, Ресей жаратылыстану ғылымдары академиясының академигі Жұмагелді Сәкенұлы, Л.Н. Гумилев атындағы Еуразия ұлттық университеті конституциялық және азаматтық құқық кафедрасының қауымдастырылған профессоры, заң ғылымдарының докторы, доцент Сәбигүл Жанабайқызы студенттердің сұрақтарына жауап берді.

Студенттер Сағындық Байсалұлының ғылыми бағыты, ғалымдардың еңбек жолы, заң мен жасанды интеллект, жетістікке жету жолы мен нарықта сұранысқа ие маман болу тақырыптарында сұрақтарын қойып, жауап алды. Ғалымдар өз еңбек жолдарын айтып, тәжірибелерімен бөлісті, жастарға қажетті ақыл-кеңестерін берді.

Ашық диалог аясында жас ғалымдар арасында жарияланған байқаудың нәтижесі қорытындыланды. Студенттер, магистранттар мен докторанттар бақ сынаған білім додасында жеңімпаздар дипломдармен марапатталып, қаржылай сыйлықтар табысталды.

1-қазан – Халықаралық қарттар күніне орай М.Х. Дулати атындағы Тараз университетінің ардагер ұстаздарына ерекше құрмет көрсетіліп, мерекеге орай салтанатты жиын  өтті.

Ардагер ұстаздарды университеттің Аппарат басшысы Мирас Бақытжанұлы құттықтап, ұстаздардың оқу ордамыздың дамуына қосқан елеулі үлестеріне тоқталды. Шәкірт тәрбиелеп, білім берген ардагер ұстаздардың орны әрдайым бөлек екенін айтып, ерен еңбек жоғары бағаланатынын тілге тиек етті. Университеттің дамуына айтулы үлес қосқан ұстаздар қауымына ректордың Алғыс хаты табысталды.

Ардақты ұстаздар, ардагерлер құрметіне ақ дастархан жайылды. Дарынды жастар арнайы концерттік бағдарлама әзірлеп, өнер көрсетті.

Құрметке кенелген ардагерлер қауымы өз ризашылықтарын білдіріп, жастарға ақ батасын берді.

М.Х. Дулати атындағы Тараз университетінің студенті Айбек Оралбай бокстан Азия чемпионатында топ жарып, чемпион атанды! 

Бұл – тынымсыз еңбектің, табандылықтың және жеңіске деген жігердің жемісі.

Айбекті жеңісімен құттықтаймыз! Университетіміздің абыройын биікке көтеріп, көк туымызды көкке көтере бер! 

Жеңісің құтты болсын, Айбек! Жаңа белестерде сәттілік! 

21-30 қыркүйек аралығында М.Х. Дулати атындағы Тараз университетінде алты жоғары мектеп ұжымымен кездесулер өтті. Негізгі тақырыптар: 2025–2026 оқу жылындағы KPI нәтижелері, Негізгі тиімділік көрсеткіштері (KPI) туралы ереженің жаңа редакциясы және келесі есепті кезеңге арналған міндеттер болды. Кездесулерді Басқарма мүшесі – Стратегиялық даму және интернациоландыру жөніндегі проректор Есімова Шолпан Алтынбекқызы өткізді.

Кездесу барысында профессор-оқытушылар құрамы (ПОҚ), кафедралар мен жоғары мектептердің KPI нәтижелеріне жасалған талдау ұсынылды. Өткен жылдың қорытындысы бойынша университет ПОҚ-тың 100 үздік өкілі, үш үздік кафедра және үздік жоғары мектеп анықталды.

KPI-дың негізгі бағыттары –  ғылыми, академиялық, әлеуметтік-мәдени қызмет бойынша нәтижелер қарастырылып, мықты тұстар мен дамытуды талап ететін бағыттар белгіленді.

KPI – стратегияны жүзеге асыру құралы

KPI туралы ереженің жаңа редакциясына ерекше назар аударылды. Ереже әзірлеу барысында көрсеткіштердің М.Х. Дулати атындағы Тараз университетінің 2029 жылға дейінгі даму бағдарламасымен, 2029 жылға дейінгі Ғылым мен білімді дамыту тұжырымдамасымен, сондай-ақ Жамбыл облысының даму бағдарламасымен өзара байланысы қамтылды.

Осылайша, KPI индикаторлары ПОҚ-тың жеке нәтижелерін бағалауға ғана емес, сонымен қатар университеттің стратегиялық мақсаттарына қол жеткізуге және оның өңірді дамытуға қосатын үлесіне бағытталған.

Жаңа редакцияда университеттің заманауи міндеттерін айқындайтын бағыттар күшейтіліп, толықтырылды, оның ішінде:
 «Жасыл күн тәртібі» және тұрақты даму принциптері;
 Инвестициялар тарту және бюджеттен тыс қаржыландыруды дамыту, соның ішінде эндаумент-қорын қалыптастыру мен дамыту;
 Жұмыс берушілермен өзара іс-қимыл жасау және білім берудің экономиканың нақты секторымен байланысын нығайту;
 Ғылыми және инновациялық қызметті дамыту;
 Кафедралардың, жоғары мектептердің және ғылыми-зерттеу бөлімшелерінің нәтижелілігін арттыру.

Сондай-ақ, балл есептеу тәртібі, жауапкершілік аймақтары, растаушы құжаттарға қойылатын талаптар, KPI жүйесімен жұмыс істеу процедуралары мен ынталандыру механизмдері түсіндірілді.

Кездесудің маңызды бөлігі профессор-оқытушылар құрамымен ашық диалог болды. Әріптестер сұрақтар қойып, тәжірибеде кездесетін қиындықтарды атап өтті және жүйені жетілдіру бойынша ұсыныстар енгізді.

М.Х. Дулати атындағы Тараз университеті экологиялық жауапкершіліктің жоғары стандарттарын көрсетіп, UI GreenMetric World University Rankings 2026 беделді жаһандық экологиялық тұрақтылық рейтингіне сәтті енді.

30 қыркүйек күні Қытайдың Линпин қаласында М.Х. Дулати атындағы Тараз университеті мен Линпин тарапы арасында тоқыма, цифрлық сән, білім, ғылым және өндіріс салаларындағы ұзақ мерзімді ынтымақтастықты дамытуға бағытталған рамкалық келісімге қол қойылды.

Қазақстан тарапынан құжатқа М.Х. Дулати атындағы Тараз университетінің Басқарма төрағасы - Ректор Ләззат Еркінбаева қол қойды. Келісім Тараз бен Линпин арасындағы университет, кәсіпорын және шығармашылық индустрия өкілдерін біріктіретін практикалық жобаларды іске асыруға негіз қалайды.

Ынтымақтастықтың негізгі бағыттары ретінде тоқыма материалдары мен жібек өндірісі, цифрлық сән, 3D жобалау және виртуалды киіп көру, функционалды және экологиялық материалдар, мәдени мұраға негізделген заманауи дизайн, инженерлер мен дизайнерлер даярлау, сондай-ақ зерттеу нәтижелерін коммерцияландыру белгіленді.

Келісім аясында студенттер мен оқытушылардың Линпин кәсіпорындарында тағылымдамадан өтуі, қытайлық мамандардың Дулати университетінің білім беру бағдарламаларына, шеберлік сабақтарына және бірлескен ғылыми жобаларына қатысуы, прототиптер әзірлеу және студенттік стартаптарды қолдау көзделеді.

Ләззат Еркінбаева қол қойылған құжаттың формалды байланыспен шектелмей, зерттеуден өндіріске және нарыққа дейінгі толық ынтымақтастық тізбегін құруға мүмкіндік беретінін атап өтті. Оның айтуынша, Линпиннің өндірістік, дизайнерлік және цифрлық тәжірибесі Қазақстанның жас таланттарымен, табиғи материалдарымен және ғылыми әлеуетімен ұштасуы мүмкін.

Дулати университеті Линпин әкімшілігі мен кәсіпорындарын болашақ «Жібек жолы» тоқыма, цифрлық сән және креативті индустриялар консорциумының индустриялық серіктестері болуға шақырды. Консорциумға Орталық, Шығыс және Оңтүстік Азияның университеттері, зерттеу орталықтары, дизайнерлік ұйымдары мен кәсіпорындарын тарту ұсынылады.

2027 жылға арналған алғашқы практикалық қадамдар қатарында екі тараптан үйлестірушілерді бекіту, бірлескен жұмыс жоспарын әзірлеу, тағылымдама базаларын анықтау және Қазақстан мен Қытайда таныстырылатын демонстрациялық жобаны іске қосу бар.

Қол қойылған рамкалық келісім Дулати университетінің Қытаймен технологиялық және білім беру байланыстарын кеңейтіп, Тараздың тарихи Жібек жолындағы мәдени мұрасын заманауи тоқыма өндірісімен, цифрлық технологиялармен және креативті кәсіпкерлікпен байланыстыратын жаңа кезеңді бастайды.

30 қыркүйек күні Ханчжоу қаласында цифрлық сән саласындағы таланттар, академиялық орта және индустрия өкілдерінің халықаралық конференциясы өтті. Ауқымды іс-шараға әлемнің 18 елінен 400-ден астам қатысушы жиналды. Қазақстандық делегацияны М.Х. Дулати атындағы Тараз университетінің Басқарма Төрағасы – Ректор Ләззат Еркінбаева басқарды.

29 қыркүйекте Ханчжоу қаласында М.Х. Дулати атындағы Тараз университетінің делегациясы мен Чжэцзян ғылыми-техникалық университеті  арасында жұмыс кездесуі өтті. Қытай тарапынан кездесуге университет проректоры Чэнь Айси қатысты.

Чжэцзян ғылыми-техникалық университетінің проректоры Чэнь Айси Дулати университетінің Басқарма Төрағасы – Ректор Ләззат Еркінбаеваны қарсы алып, университеттің білім беру, ғылыми зерттеулер және өнеркәсіппен ықпалдастық салаларындағы басым бағыттарын таныстырды. Қытай тарапы нақты жобаларды дамытуға және екі университет арасындағы байланыстарды тереңдетуге мүдделі екенін білдірді.

Кездесу аясында төртжақты ынтымақтастық туралы шартқа қол қойылды. Құжат білім беру, ғылыми зерттеулер, мамандар даярлау және бірлескен жобаларды іске асыру бағытында серіктестікті практикалық тұрғыдан дамуға негіз қалайды.

Кездесу барысында тараптар тоқыма ғылымы, киім дизайны, жаңа материалдар, инженерлік білім беру, жасанды интеллект, цифрландыру және мәдени мұраны зерттеу салаларындағы ынтымақтастықтың перспективаларын талқылады. Сондай-ақ бірлескен білім беру бағдарламаларын іске асыру, оқытушылар мен студенттердің академиялық алмасуын кеңейту, магистранттар мен докторанттарға бірлесіп жетекшілік ету және ғылыми әзірлемелерді өндіріске енгізу мәселелеріне назар аударды.

Дулати университетінің Басқарма Төрағасы - Ректор Ләззат Еркінбаева өз сөзінде Тараздың Ұлы Жібек жолындағы тарихи орнына тоқталды. Ол ежелгі Тараз арқылы тауармен қатар білім, технология, көркемдік дәстүрлер мен идеялар тарағанын атап өтіп, бүгінде осы сабақтастықты білім беру, ғылым, цифрлық технологиялар және мамандарды бірлесіп даярлау арқылы жалғастыру қажет екенін айтты.

Ләззат Қалымбекқызы Чжэцзян ғылыми-техникалық университетінің тоқыма ғылымы, киім дизайны, жаңа материалдар, инженерлік даярлық және жасанды интеллект салаларындағы жоғары құзыреттерін ерекше атап өтті. Бұл бағыттар Дулати университетінің тоқыма, жеңіл өнеркәсіп, дизайн, цифрландыру және мәдени мұраны зерттеу салаларындағы мүмкіндіктерімен өзара үйлеседі.

Кездесудің негізгі тақырыптарының бірі – Қазақстанда инженерлік-техникалық кадрларды қайта даярлауға арналған шетелдік институт құру бастамасы болды. Болашақ алаң қысқа мерзімді бағдарламаларды, оқытушылар мен кәсіпорын мамандарының біліктілігін арттыруды, бірлескен оқу модульдерін әзірлеуді және заманауи өндірістік технологияларды трансферттеуді қамтуы мүмкін.

Чжэцзян ғылыми-техникалық университеті Жоғары мектебінің деканы Пан Сюйвэй «Шетелдегі үздік инженерлер колледжі» жобасы туралы арнайы баяндама жасады. Ол Қазақстан университеттерінің студенттеріне арналған инженерлік магистратура бағдарламасының тұжырымдамасын таныстырды. Ұсынылған модель университеттер мен кәсіпорындардың бірлескен қабылдауын және даярлауын, оқу мен өндірістік тәжірибені кезектестіруді, сондай-ақ қытайлық, қазақстандық және кәсіпорын үш жетекшінің қатысуын көздейді.

Бағдарламаның болжамды ұзақтығы екі-үш жылды құрайды: білім алушылар даярлықтың бастапқы кезеңін Қазақстандағы серіктес университеттер мен кәсіпорындарда, кейінгі кезеңін Чжэцзян ғылыми-техникалық университетінде өткізеді. Тараптар оқу жоспарларын, кредиттерді өзара тануды, қабылдау шарттарын, кәсіпорындардың қатысуын және ағылшын тілінде оқыту мүмкіндігін одан әрі нақтылауға уағдаласты.

Тараптар сондай-ақ «Жібек жолы» цифрлық және интеллектуалды киім жөніндегі бірлескен зертхананың қызметіне ерекше назар аударды. Зертхана бірлескен зерттеулер, академиялық алмасу, прототиптер әзірлеу, ғылыми жарияланымдар мен патенттер дайындау, сондай-ақ университеттер мен кәсіпорындардың өзара іс-қимылы үшін практикалық платформа ретінде қарастырылды.

Кездесуде болашақта тоқыма, цифрлық сән, жаңа материалдар, дәстүрлі қолөнер және креативті индустриялар саласында жұмыс істейтін университеттердің кең халықаралық желісін қалыптастыру мүмкіндігі де талқыланды. Дулати университеті осы бастамаға Орталық, Шығыс және Оңтүстік Азиядағы жоғары оқу орындары мен серіктестерді тартуға дайын екенін жеткізді.

Кездесу қорытындысы бойынша тараптар ұсынылған бастамаларды нақтылау және практикалық жобаларды кезең-кезеңімен іске қосу бағытындағы жұмысты жалғастыруға уағдаласты.

Ләззат Еркінбаева қытайлық әріптестерді көне Тараз қаласына және Дулати университетіне сапармен келуге шақырды.