Бүгін Тараз қаласында Д.И. Менделеев атындағы Ресей химия-технологиялық университеті мен М. Х. Дулати атындағы Тараз университеті индустриялық серіктес — «Қазфосфат» ЖШС-нің қолдауымен жүзеге асырған желілік білім беру бағдарламасы бойынша түлектерге диплом тапсырудың салтанатты рәсімі өтті.

Жеті студент қыз бірлескен бағдарламаның алғашқы түлектері атанып, екі дипломға — Дулати университеті мен Д.И. Менделеев атындағы Ресей химия-технологиялық университетінің дипломдарына ие болды. Бұл маңызды оқиға химия саласына арналған бәсекеге қабілетті инженерлік кадрларды даярлауға бағытталған екі университет пен индустриялық серіктестің стратегиялық әріптестігінің алғашқы нәтижесі болды.

Бағдарлама Дулати университеті тарапынан белсенді қатысу арқылы кезең-кезеңімен әзірленіп, іске асырылды. Алғашқы кезеңде университет базасында РХТУ өкілдігі ашылып, желілік оқыту форматы іске қосылды. 2024 жылғы қыркүйек айынан бастап Тараз қаласында Д.И. Менделеев атындағы РХТУ филиалы жұмысын бастады, бұл халықаралық білім беру ынтымақтастығын және академиялық ұтқырлықты дамытудың маңызды қадамына айналды. Желілік бағдарлама аясындағы оқу Мәскеу қаласындағы РХТУ-дың бас университетінде бір жылдық оқуды қамтыды, бұл халықаралық білім беру стандарттарын енгізуге және мамандарды тәжірибеге бағытталған форматта даярлауға мүмкіндік берді.

Бағдарлама түлектерінің барлығы бүгінгі таңда «Қазфосфат» ЖШС кәсіпорындарына жұмысқа орналасып, нақты экономика секторының сұранысына толық сәйкес келетіндігін дәлелдеді.

Салтанатты іс-шараға мемлекеттік органдардың, академиялық қауымдастықтың және индустриялық серіктестің өкілдері қатысты. Түлектерге құттықтау сөз сөйлегендер қатарында Қазақстан Республикасы Парламенті Мәжілісінің депутаты, РХТУ филиалы Қамқоршылық кеңесінің төрағасы Искендиров Мұқаш Зұлқарнайұлы, Ш. Мұртаза атындағы Халықаралық Тараз университеті Президентінің кеңесшісі Сүлейменов Жүсіпбек Таширбайұлы, сондай-ақ Дулати университетінің Басқарма мүшесі, стратегиялық даму және интернационалдандыру жөніндегі проректор Есимова Шолпан Алтынбекқызы және «Қазфосфат» ЖШС персоналмен жұмыс жөніндегі директоры Болатов Қайрат болды.

Дулати университеті алдағы уақытта да жетекші шетелдік университеттермен және индустриялық серіктестермен бірлескен білім беру бағдарламаларын дамыту арқылы білім, ғылым және өндіріс арасындағы байланысты нығайтып, өңір мен ел экономикасы үшін сұранысқа ие мамандарды даярлауды жалғастырады.