«Философия және саясаттану» кафедрасының 50 жылдан астам қалыптасқан тарихы бар. Қазіргі таңда кафедрада штаттық кесте бойынша 14 профессор-оқытушы құрамы (ПОҚ) қызмет атқарады. Оның ішінде 5 философия ғылымдарының кандидаты, бұл жалпы оқытушылар санының 35,7 %-ын құрайды. Аталған кандидаттардың екеуі зейнет жасындағы оқытушылар. Кафедраның кадрлық құрамы сапалық және сандық көрсеткіштер бойынша толық қамтамасыз етілген.
Кафедра миссиясы – дүниетанымдық, азаматтық және адамгершілік ұстанымдарды қалыптастыру негізінде болашақ маман тұлғасының әлеуметтік-мәдени дамуын қамтамасыз ету.
ОҚУ-ӘДІСТЕМЕЛІК ЖҰМЫСТАР
Кафедра пәндерін әдістемелік тұрғыдан қамтамасыз ету мақсатында оқу-әдістемелік құралдар мен оқулықтар әзірлеу жұмыстары белсенді түрде жүргізілуде. Атап айтқанда, кафедра оқытушылары Кульбаева Д.Д., Куандыкова Э.Ж., Г.К. Мусабекованың «Философия» пәнінен оқу құралы, сондай-ақ Иманбаев А.А., Иманбекованың орыс тілінде жарық көрген «Саясаттану» пәні бойынша оқу-әдістемелік құралы ағымдағы оқу жылында баспадан шықты.
Сонымен қатар, Джуншеев Р.Е. мен Г.К. Мусабекованың «Философия», «Ғылым тарихы мен философиясы» оқу құралдары, доцент Г.Б. Нурадиннің «Практикалық философия» оқу құралы және Г.К. Мусабекованың «Ежелгі Шығыс философиясы» (құрылымдық сызбалар мен кестелер) оқулығы Әл-Фараби атындағы Қазақ ұлттық университеті жанындағы Республикалық оқу-әдістемелік кеңестің оқу-әдістемелік бірлестігінің (РОӘК ОӘБ) шешімімен Қазақстан Республикасының жоғары және жоғары оқу орнынан кейінгі білім беру ұйымдарында пайдалануға ұсынылды. Қазіргі таңда аталған еңбектер еліміздің жоғары оқу орындарының кітапханаларына таратылуда.
ҒЫЛЫМИ-ЗЕРТТЕУ ЖҰМЫСТАРЫ
Кафедра оқытушыларының ғылыми мақалалары Scopus және Web of Science халықаралық дерекқорларына енетін журналдарда, сондай-ақ Қазақстан Республикасы Оқу-ағарту министрлігінің Білім саласында сапаны қамтамасыз ету комитеті талаптарына сәйкес ғылыми басылымдарда тұрақты түрде жарияланып келеді.
Кафедрада «ХХІ ғасыр адамының саяси-мәдени болмысына философиялық талдау» тақырыбындағы 2025-2027 жылдарға арналған үш кезеңдік ғылыми-зерттеу жұмысы жүзеге асырылуда. Қазіргі уақытта зерттеудің екінші кезеңі – ХХІ ғасыр адамының мәдени-антропологиялық аспектілерін зерделеу жұмыстары жүргізілуде.
Кафедраның қауымдастырылған профессоры (доценті) Г.Б. Нурадин Coursera платформасындағы қазақстандық жаппай ашық онлайн курстар (ЖАОК) топтамасын «Философияның іргелі тұжырымдамалары» курсымен толықтырды. Аталған курс Қазақстанда әзірленген 20-шы онлайн курс болып табылады.
Сонымен қатар, кафедра оқытушылары 2024-2026 жылдарға арналған, жалпы құны 87 млн теңгені құрайтын «Практикалық философия: әлеуметтік-гуманитарлық пәндерді оқытудағы интегралды білім беру мен дизайн-ойлау тұжырымдамалық метамоделі» тақырыбындағы гранттық қаржыландыру жобасы аясында ғылыми жұмыстар жүргізуде.
Кафедра жанындағы «Логос» ғылыми-танымдық үйірмесі студенттердің ғылыми-зерттеу қызметін дамытуда маңызды рөл атқарады. Үйірме ұйымдастыруымен университет студенттерімен қатар, облыс және қала мектептері мен колледж студенттерінің қатысуымен шағын ғылыми-тәжірибелік конференциялар өткізу дәстүрге айналған.
ҚОҒАМДЫҚ-ӘЛЕУМЕТТІК ЖҰМЫС
Кафедра ұжымы университеттің, қаланың және жалпы қоғамның әлеуметтік-қоғамдық өміріне белсенді түрде қатысып келеді. Атап айтқанда, Кульбаева Д.Д. мен Джуншеев Р.Е. Жамбыл облысы Қазақстан халқы Ассамблеясы жанындағы ғылыми-сараптамалық топтың мүшелері болып табылады. Кафедра оқытушылары елімізде жүзеге асырылып жатқан саяси-әлеуметтік реформалар мен қоғамдағы өзекті мәселелерге қатысты бұқаралық ақпарат құралдары мен әлеуметтік желілерде тұрақты түрде ғылыми-талдамалық мақалалар жариялап отырады.
